Programa Ti Nurse Practitioner

Ti Lāna‘i Community Health Center (LCHC) ket nanglukat idi Setyembre, taw-en 2008 nga mangipapaay ti serbisyo na iti siyensiya ti kinasalun-at. Sipud ti lukat na, nangrugi metten dagiti “health providers” nga agtrabahon ken naaramid metten ti oras a panangited iti serbisyo. Iti naimeng nga kasla la balay ti simpa na, ti LCHC ket  maysa kadagiti pagpilian nga mangtaripato iti salun-at para iti amin nga lumugar ditoy Lanai. Kas mainayon, daytoy nga health center ket mangipapaay pay iti modelo a pannakaasikaso iti salun-at. Pinili ti LCHC ti nang-hire iti makunkuna a “family nurse practitioners (FNP’s) nga agtrabaho, saan nga dodoktores – isu nga daytoy iti pagdumaan, iti pannakaited iti makunkuna a “model of care choice” a pangipaay iti naindumaan a serbisyo ditoy komyunidad tayo.

Dagiti Family Nurse Practitioners ket adda kabukbukodan da a paglaingan – kayat na a saw-en nga expertoda ken addaanda iti “credentials” tapno makatarabaho da uray awan doktor nga mangiwanwan kadakuada. Dagiti Family Nurse Practitioners ti LCHC ket mabalin da pay iti agireseta iti agas para kadagiti pasyente – a kasla met laeng kadagiti dodoktores. Amin dagiti FNP’S ket rehistrado da nga providers iti isu amin nga kita ti health insurance (i.e., Medicare, Medicaid, Aloha Care, Quest, HMSA, ken dadduma pay), ken kasta met iti pannakitarabaho da babaen iti panangawatda kadagiti pribilihiyo nga it-ited ti  Lanai Community Hospital.

Ngem adda pagdumaan ti FNP’s ken MD’s – ti makuna a “model care,” dagiti dokdoktor ket usarenda ti makuna a ‘medical model’ ket dagiti met FNP’s usarenda met iti makuna a ‘nursing model’. Ti ‘medical model’ ket sakupenna amin nga wagas a panangamiris iti salun-at maipanggep iti lubong ti siyensiya. Ngamin ket agduduma ti kinatao ken dimmakelan nga wagas iti panagbiag. Agduduma dagiti sistema a kayat iti bagi nga pannakaasikaso ken pannakasolbar ti problema a mainaig kadagiti pasyente. Sakupenna amin ti pannakaamiris ti kinatao, ken historya dagiti kaputotan sakbay nga madeterminaran no ania ti maiparbeng nga care plan. Iti met makuna a “nursing model,” maipalawag met iti panangamiris ti kinaimportante ti relasyon nga maibulig iti panagbiagtayo. Kas caregivers, ad-adu ti usarenda nga oras a pannaki-um-uman kadagiti histories da a pakainayonan metten ti panangadal da kadagiti pasyente kas maibasar iti bukodda nga kabibiag wenno lifestyle. Iti pannakisarrsarita nga buyogan ti panangiparikna ti pammateg ken panangilala ket isu ti centro ti imatang ti “nursing model.” Daytoy ti wagas nga aramidenda tapno maasistiran dagiti pasyente kadagiti problema wenno rikriknaen da maipanggep iti salun-at da.

Napaneknekan nga dagiti FNP’s ket 90% ti kinatalged ti it-itedda nga serbisyo kadagupan kadagiti ub-ubbing nga pasyente, 80% met kadagiti natataengan nga pasyente. Awan ti pagdumaan na ti serbisyoda kadagiti MD’s, nasaysaya-at pay ketdi. Napaneknekan pay nga bassit laeng wenno awan pay ti pagdumaan ti “health status” dagiti pasyente nga at-atendaran dagiti FNP’s. Mainayon pay nga no adu dagiti lab tests nga ipaaramid dagiti FNP’s, nalaklaka nga amang ti gastos ken pumadpada pay ti kaadu ti “patient’s visit.” Ken kasta met nga basbassit dagiti mai-hospital nga pasyente nga at-atendaran dagiti FNP’s. Nangatngato pay ti grado da maipanggep kadagiti resolusyon a panangtakuat kadagiti problema maipanggep ti salun-at, pannakaparagsak kadagiti pasyente, panangipagna kadagiti rebbengen iti kada pasyente, pannakapnek ti pasyente, panangipagna ken panagtulnog kadagiti pagrebbengan a kas pasyente.
Please call for additional information and an appointment 565-6919 x121

Itattan ammoyon – Dagiti LCHC Family Nurse Practitioner providers ket mangidatdatonda iti pagpilian ditoy komyunidad tayo! Ti kaawan ti doktor nga agtrabaho iti LCHC ket saan nga makaigapu ti kaawan ti panangdan no di ket mangited pigsa – ken pagpilian para kenka! No kayatyo ti makiinnuman wenno agpa-appointment, umawag kayo laeng iti numero nga 565-6919 ket sisasagana kami nga agserbi para kadakayo.